புள்ளி

புள்ளி..

புள்ளி
உங்களுக்கு புள்ளியாகவே தெரியுமானால்
புள்ளியளவில் தான் இருக்கிறது
உங்கள் புரிதல்.

புள்ளி என்பது
புள்ளியே அல்ல.

புள்ளி
ஒரு கோடு.
புள்ளி
ஒரு வட்டம்.
புள்ளி
ஒரு நான்.
புள்ளி
ஒரு நீங்கள்.
புள்ளி
ஒரு பூமி.
புள்ளி
ஒரு சூரியன்.

புள்ளியை தொடர்ந்து வரும்
புள்ளிகளின் தொடச்சியில் தான்
கோடு வந்தது.
வட்டமும்.

விந்தின் ஒரு புள்ளியாய் தான்
நான் வந்தேன்.
நீங்களும்.

வெளியின் ஒரு புள்ளியாய் தான்
பூமி இருக்கிறது.
சூரியனும்.

பெரும் ஆலமரத்தின் மூல ஆதாரம் கூட
விதையெனும் ஒற்றை புள்ளியே.

இப்படி
புள்ளிகள் புள்ளிகளாகவே இருப்பதில்லை.

ஏன் இந்த கவிதை கூட
ஏதோ ஒரு புரிதலின் ஆதாரப் புள்ளியே.

அதாவது
தொடர்ந்து செய்யாத வரையிலும்
நெருங்கி பார்க்காத வரையிலும்
புரிந்து கொள்ளாத வரையிலும்
எல்லாமும் புள்ளிகள் தாம்.

ஆக
புள்ளி
உங்களுக்கு புள்ளியாகவே தெரியுமானால்
புள்ளியளவில் தான் இருக்கிறது
உங்கள் புரிதல்.