தத்துவம்

எனக்கு போலவே
கனகு மாமாவின்
செல்பேசி அழைப்பின் போதொலிக்கும்
அந்தப் பாடல் அபி அக்காவுக்கு
அவ்வளவு பிடிக்கும்.
கனகு மாமாவையும் தான்.
அப்போது, குடும்ப நிர்பந்தத்தால்
"நீங்க கை நீட்டுற எடத்துல
கழுத்த நீட்டுறேன்" என்று
பிடிக்காத அத்தை மகனுக்கு வாக்கப்பட்டு
ஒத்தைப் புள்ளையும் பெத்து
அதுக்கு வயசு ஒன்னும் ஆகி
இந்தத் தீபாவளிக்கு ஊருக்கு வந்தப்போது
என் கைபேசியில் ஒலித்த
அதே பாடலை கேட்டு
கனகு மாமாவை
பார்வையாலே தேடி திரும்பிய
அந்தக் கண்களில் தான்
எத்தனை கால காதலின் ஏமாற்றம்?

• பித்தன்