தத்துவம்

தலைப்பே தெரியவில்லை தலை பிய்த்துக் கொள்கிறேன் யாதையும் எழுதி தீர்த்து விட வேண்டுமென மனதுள் ஓர் எழுச்சி. எழுத நினைக்கும் போதெல்லாம் மனிதர்களை போலவே நான் முன் நீ முன் என
வார்த்தைகள் முட்டி மோதி ஒன்றை ஒன்று வெட்டி வீழ்த்திக் கொள்கின்றன. வார்த்தைகளற்று போன என் எழுதுகோள் முறையொன்று முயன்று.... தோற்று... சோர்ந்திடும் மனிதனை போலவே துவண்டு
போகிறது. சொல்லிலுள்ள உறுதி தன்னுள்ளற்று சொல்லை செயலாக்கம் செய்யத் தவறும் மனிதனை போலவே எழுதத் துடித்த என் விரல்கள் தளர்ந்து மடிகின்றன. முடியாது என்பதற்காக முயலாமல்
இருக்க கூடாதென மனமொடியாமல் எழுச்சி இழந்த மனதோடு எழுந்து நடக்க முயன்றேன். மிரண்டவனுக்கு இருண்டதெல்லாம் பேயென நம்பிக்கை இழந்த மனிதனை போல் மனம் நடக்க நடுங்கியது. ஒன்றும்
முடியாத நான் ஓய்வு கொள்ள எண்ணி உறக்கமாவது இரக்கம் கொண்டென்னை இமை தழுவுமென கண் மூடினால் நாகரீக காலத்திய காதல் சோடிகளாய் இமைகள் நான்கும் சண்டைகளிட்டு கொள்கின்றன.
எழுத்தில் அடங்காது கழுத்து வரை வளர்ந்து நிற்கும் சோகத்தை வாய் விட்டு சொல்ல நினைத்த நேரம் அட்சதைகளிட அழைத்து வந்தவளை வரதட்சணை கேட்டு கட்டி புடவையோடு கழுத்தை பிடித்து
வெளி தள்ளும் கணவனென வார்த்தைகள் ஏதுமின்றி எச்சிலோடு துப்பி எரிகிறது என் நாக்கை வாய். சொல்லுக்குள்ளும் அடங்காத சோகத்தை உயிர் செல்லுக்குள் சேமிக்க எண்ணி
இருதயத்திற்கனுப்பினால் பணத்தாசை பிடித்த மனித மிருகத்தை போல குருதிக்கு மட்டுமே அனுமதி உண்டென உறுதியாய் சொல்லி விட்டது. தண்ணீரில்லாத தேசத்தில் மாட்டிக் கொண்டவன் தன்
மூத்திரத்தை குடித்தேனும் வாழ முயற்சிப்பதை போல என்னை அரிக்கும் அமில சோகத்தை காற்றோடு காற்றாய் கரைத்து விட வேண்டுமென மூச்சோடு சேர்த்து வெளி விட்டேன் ஐயய்யோ மனிதன்
புதைத்து விட்ட மாசுக் காற்றிலுள்ள விஷக் கிருமிகள் எல்லாம் என் சோகப் பொக்கிசத்தை தின்று தீர்க்க பார்க்கின்றன... வேண்டாம் வேண்டாவே வேண்டாம் அந்த அமில சோகங்கள் எல்லோரும்
மூக்கடைத்து கடந்து போகும் சுத்தம் செய்யப்படாத சாக்கடை கழிவென என்னுள்ளே எங்கேனும் தேங்கி கிடக்கட்டும். அவசரத்தில் கொஞ்சம் ஆத்திரத்தில் சாதி மாறி காதலித்த மகளை வெட்டி
விட்டு கட்டி பிடித்தழும் தற்கால தகப்பனென சிந்திக்காலே உள்ளிழுத்து விட்டேன் விஷக் கிருமிகளையும்... நாசி நுழைந்த இந்த நச்சுக் கிருமிகள் என் தலைக்கேறும் முன்னே யாராலும்
விமர்சிப்புக் குள்ளாகாமல் வாழ்வுறும் மனிதனைப் போலொரு வீரியத் தலைப்பிடுங்கள் இந்த வார்த்தை பிண்டத்திற்கு.