கவிதை

காசு கொடுத்தே குடித்தாலும் எல்லோருக்கும் கண்ணாடி டம்ளரிலும் எனக்கும் என் அப்பனுக்கும் பேப்பர் டம்ளரிலும் தேநீர் வழங்குவார்கள். எல்லோரும் அங்கிருக்கிற பெஞ்சிலும்
சேரிலும் உட்கார்ந்திருந்தால் நானும் என் அப்பனும் ஓரமாய் கிடக்கிற டயர் மீது உட்கார்ந்திருப்போம். இது எல்லாம் நடந்து கொண்டிருந்த போது நீயும் மேலே தான் இருந்தாய். மேலும்,
இதைப் பற்றி உன்னிடம் கேட்டால் நாங்கள் ஏதோ விரும்பி பேப்பர் டம்ளர் கேட்டு வாங்கியதாகவும் விரும்பி டயர் மேல் உட்கார்ந்திருந்ததாகவும் நினைத்தேனென்று கூட நீ சொன்னாலும்
சொல்வாய். நண்பா மேலே இருந்து பார்க்கிற வரை இப்போது மட்டுமில்லை எப்போதுமே புரியாது எங்களின் வலி உனக்கு. வா வந்து எங்களோடு டயர் மீது உட்கார். முகம் பார்த்து அடையாளம்
கண்டு பேப்பர் டம்ளரில் தரப்படும் தேநீர் பருகு. காசு கொடுத்தாலும் தினசரி கூட வீட்டுக்கு வராத கொடுமையை அனுபவி. வீட்டுக்கொரு குடிநீர் குழாய் இருக்கிற இந்த ஊரில் நூறு
வீடுகளுக்கு மேல் இருக்கிற எங்கள் தெருவில் ஒரே ஒரு குடிநீர் குழாய் அமைக்கப்பட்டிருப்பதன் அரசியல் கவனி. நரை வழியும் என் பாட்டனை வயசில் குறைந்தவரெல்லாம் வாடா போடா என்று
சொல்லும் மேல் சாதி திமிர் காண். வா. அப்போதும் புரியவில்லை என்றால் எங்கள் வீட்டுக்கு வந்து எங்களோடு பழகி எங்களோடு ஒன்றாய் அமர்ந்துண்டது பற்றி உன் அப்பனிடம் போய் சொல்.
அவன் புரியவைப்பான்.