சிறுகதை

நானும் தம்பியும். ❤️ டெக்னாலஜி அவ்வளவாக வளராதா அல்லது எங்கள் ஊர் பக்கம் டெக்னாலஜி எட்டிப் பார்க்காத காலம் அது.அப்போது எல்லாம் போட்டோ எடுப்பது அவ்வளவு லேசுபட்ட
காரியமில்லை. பஸ் ஏறி டவுனுக்குப் போக வேண்டும். அதுவும் இப்போது போல போட்டோ எடுத்த உடனே எல்லாம் கையில் தர மாட்டார்கள். ரெண்டு மூன்று நாள் ஆகும். இந்த போட்டோ எடுத்தபோது
எனக்கு ஒரு ஏழு வயது இருக்கும்.இதில் தம்பி தம்பி போல இருக்க மாட்டான். அது ஒரு கதை. எங்கள் வீட்டில் பிள்ளைகள் என்றால் அக்கா, நான், தம்பி. அக்கா பிறந்த ஐந்து வருடங்களுக்கு
பிறகு நான். (எனக்கும் அக்காவும் இடையில் மூன்று பெண் பிள்ளைகள் பிறந்தார்களாம். இப்போது இல்லை. ) நான் பிறந்த மூன்று வருடங்களுக்கு பிறகு தம்பி. மூன்று பேருமே சுகப்பிரசவம்.
அம்மா, வீட்டுக்கு பின் புறம் போய் வந்த போது வாசப்படியருகிலேயே தம்பி பிறந்து விட்டானாம். (அதானலே அவனுக்கு வாசக்காத்தான் என்றொரு பெயரும் உண்டு.) வெள்ளையாக இருந்ததால்
யாரும் அவனை நெருங்க வில்லை. பெண் என்று நினைத்து. அப்படியே மண்ணை தின்ன படி குப்புற கிடந்தானாம். அப்பறம் ஒரு பாட்டி வந்து திருப்பி பார்த்து விட்டு "ஏன்டி கூறு கெட்ட
சிரிக்கிகளா.. பையன் டி வந்து எடுங்க டி.. முட்டா...." என்று திட்டி எடுத்துக் கொடுத்தாளாம். அப்பறம் தான் அம்மா வாங்கி பார்த்தாளாம். பெண் என்று சந்தேகித்ததாலோ என்னவோ
அவன் நல்ல சிவப்பாக பெண்போல அழகாகவே இருப்பான். அதானலேயே அவனுக்கு ஐந்தாறு வயது வரை சடை பிண்ணி பூ வைத்து காலுக்கு கொலுசு மாட்டி விட்டு அழகு அழகு பார்த்து வளர்த்தார்கள்.
மாதேஸ்வரன் கோவிலுக்கு முடி கொடுப்பதாக உத்தேசித்திருந்தால், அந்த முடியை சடை பிண்ணி பூ வைத்து அவனை(தம்பியை) ஒரு போட்டோ எடுக்கப்பதற்காக புது உடை எல்லாம் எடுத்து வந்து
அலங்கரித்து கூட்டிப்போனார்கள். இதில் உண்மை யில் அவன் மட்டும் தான் இருந்திருக்கு வேண்டும். அவர்கள் கிளம்புகிற கடைசி நேரத்தில் நான் நானும் வரேன் என்று அழுது அடம் பிடித்து
பழைய சட்டையையும் பாண்ட்டையும் எடுத்து மாட்டிக் கொண்டு அவசர அவசரமாக ஓடினேன். இந்த போட்டோவில் கொஞ்சம் விறைப்பாக மேசை மீது கைய அழுத்தி வைத்து கொண்டு இருப்பேன். அப்போது
எனக்கும் தம்பிக்கும் போட்டோ என்றால் ஆச்சர்யத்துக்குரிய விசயம். மேலும் இந்த புகைப்படம் எனக்கும் தம்பிக்கும் ஏன் என் வீட்டாருக்கும் கூட ரொம்ப ஸ்பெசல். ஏனெனில் எனக்கும்
அவனுக்குமாய் சேர்த்து எங்கள் வீட்டில் இருக்கிற எங்களின் ஒரே சின்ன வயசு போட்டோ. அதாவது இது தான் என் மற்றும் அவனின் முதல் போட்டோ.