காற்றின் காதுகள்

இந்த அண்டவெளியே அதன் செவி.
பக்கம் பார்த்து பேசென்பார்கள்
எப்படி பார்த்து பேசினாலும்
ரகசியம் கசிந்து விடும்.

கெட்டும் கெடாமலும் இருக்கிற
எல்லா வார்த்தைகளையும்
உரையாடல்களையும் கேட்டுக் கொண்டு
தானிருக்கின்றன
காற்றின் அகண்ட காதுகள்.

நேற்றைக்கு முன் தினம்
உல்லாசமாய் பேசிக் கொண்டிருந்த
ஒரு அரசாங்க அதிகாரியின்
உரையாடல் ஊரெல்லாம் பரவி விட்டதாம்.
எப்படியென யாருக்கும் தெரியவில்லை.

மும்பையில் குண்டு வைப்பது
சுவிஸ் வங்கியில் கொள்ளை அடிப்பது
காதலியோடு ஊர் சுற்ற போவது
இப்படி எதை பற்றி பேசினாலும்
எல்லாவற்றையும் கேட்டுப் பதிவு செய்து வைத்திருந்து
போட்டுக் காட்டி விடுகிறதாம் அதன் காதுகள்.

இப்படி சப்தங்களை தான் கேட்டுத் தொலைக்கிறதென
எல்லோரும் சைகையாலும் சில்மிஷங்களாலும்
பேசப் பழகி கொண்டிருக்கிற சமயத்தில்

அதே காற்றின் காது வழி புதிதாய் ஒரு
புரளி கிளம்பி இருக்கிறது.

காற்றுக்கு கண் காது வாய் மூக்கு எல்லாம் முளைத்து விட்டதாம்.