கட்டுரை

பற்களை நரநரத்து
இரண்டி நீளமுள்ள கத்தியை
ஐவிரல் இடையில் ஏந்தி
கண்ணிரண்டிலும் வன்மத் தீ வழிய
அவனை துரத்திக் கொண்டோடி எட்டி உதைத்து
குப்புற கிடந்தவனை புரட்டி
கீழ் தாடையை மேல் நோக்கி பிடித்து
மின்சாரப் பாய்ச்சலில் சிக்கியதை போல்
கை கால்களை உதறித் துடிக்க துடிக்க
வாழைத் தண்டறிவது போல
அவன் கழுத்தை மிகச் சாதாரணமாய்
அறுத்து
கத்தியிலும் கையிலுமிருந்த ரத்த பிசுபிசுப்பை
செத்தவன் சட்டையில் துடைத்து போகும் அந்த கொலகாரனை விட
என் உயிரை காப்பாற்றிக் கொள்ள
இன்னொரு உயிரை
கண் முன்னே கோரபலி கொண்ட
நான் எத்தனை பயங்கரமானவன்.